19-07-00 王菲鹹豬手當眾輕撫哥哥性器官!

昨日如果大家走去旺角新世紀廣場，逛下就一定會有意外收穫，事緣陳嘉上導演的新片《戀戰沖繩》做大堆頭宣傳，王菲、張國榮及梁家輝兩王一后，三大主角齊齊報到現身，搞到不少迷哥迷姐都停晒腳「睇星」，成個商場圍到實一實，插針都唔入。

有人可能會話，啋！有乜大不了，王菲之嘛。對一D人唻講，就咁睇王菲可能真係冇乜睇頭，但昨日王菲就當眾露左一手摸「一索」絕技，搞到全場哄動，唔能夠親眼目睹，都真係幾吊癮。

話說當時王菲響度一路笑一路發雌威投訴《戀戰沖繩》張海報，話在海報中自己一拖二，好似好鬼花心咁，有破壞其形象之嫌。雖然王菲對張海報諸多聲氣，但當要即場示範時阿菲仍然聽聽話話冇托手肘。但唔知阿菲係唔係前晚同朋友打完麻雀，加上摸唔到「一索」，搞到食唔出十三么既關係，昨日示範拖手仔時竟然好似遊魂咁，一手就「抄」落哥哥隻「一索」度，知到發生乜事都已經遲晒，阿菲當場尷尬到飛起，即時三魂唔見七魄，乜都唔識做唔識講，一味耷低個頭猛笑，仲要受襲既哥哥同家輝安慰幾下，才有番D狀態。話時話好彩哥哥見慣大場面，唔似得一般男仕咁一受襲就拿拿臨用手護「祠堂」，又或者「屹籮」卸力，如果唔係，王菲可能重衰多兩錢重，怕要搵窿捐都未定。

另外，阿菲又話拍《戀》片好開心，不過就嫌自己演技渣左D。阿菲話口未完，家輝和哥哥就搶住表示，阿菲係高人一名，D演技高到離晒大譜，兩人都要睇阿菲頭做戲。哥哥又透露咪睇阿菲平日Cool到痺，其實阿菲係個玩得之人，拍戲時，經常出IQ題畀大家玩。煞科當晚更同大家一齊柴娃娃去食飯，而且阿菲仲好似好唔捨得咁，眼有淚光添。總之一句講晒，大家合作愉快啦。

<CYBER 日報>