28-08-00 霆鋒王菲閃電赴歐繼續浪漫遊

謝霆鋒前兩日到上海參加《原創音樂流行榜頒獎禮》，除霆鋒外，還有梁詠琪和陳曉東等人齊齊出席，正當成村人都睇實呢個騷，無暇他顧時，王菲博大霧，兵行險著，長途跋涉到上海，並入住名堂響噹噹的「上海金茂凱悅大酒店」可惜王菲趁亂會愛郎呢招出左漏洞，始終避唔過記者法眼。前晚十一時霆鋒做完騷，正滿心歡喜到酒店會愛人時，忽然驚覺，咦！點解有狗仔?眼見被記者撞破好事，霆鋒即刻眼耳口鼻那埋一齊，十足十「五筒」。當記者要拍照時，霆鋒個助手發晒茅撲上前護主，攬實霆鋒條腰，用肉體擋住鏡頭，但霆鋒就推開個助手。記者主動出擊問霆鋒是否住在「金茂凱悅酒店」，霆鋒眉頭都唔縐下就答：「係」，但當記者問阿菲是否專程唻陪佢時，霆鋒就唔出聲只係擰擰個頭，之後急急腳上樓。

霆鋒冇漏口風，阿菲又未見光，傳媒唯有等又再等，結果等佢唔到。一夜無話，不過就有酒店二五仔爆料話兩位紅人入住在高層豪華套房。第二日記者收到風知道霆鋒和阿菲已在秘密通道閃走左，結果大家一齊食白果。

呢對「姊弟」經過兩日足不出戶，纏綿無限後，昨日先後返抵機場，霆鋒個口明顯唔同晒，紅光滿面，連青春豆都搵唔到粒，對記者亦唔抗拒，但無論記者問乜，霆鋒都交行貨，仲不斷兜圈。

雖然傳媒在上海影唔到王菲，捉唔到阿菲痛腳，但發生乜事大家心照啦！昨晚阿菲返港時個樣甜到漏，但就同霆鋒一樣乜都唔肯講。

好囉，「姊弟」已經回歸，大家唔使做啦！如果咁諗就錯晒。因為「姊弟」仲未happy完，要再斬四兩。

阿菲昨晚七時回港之後，就返回寓所，連凳都未坐暖就帶著個乖乖女靖童出門，一直殺去經理人陳家瑛住所，之後阿菲單拖離開，並直奔飛機場。與此同時，霆鋒亦採取行動驅車到機場，但其間聞到「狗味」，遂嘗試同「狗仔」鬥法，架車不停地左穿右插加兜圈想賣甩記者，但霆鋒最終鬥唔過時間，霆鋒驚飛機唔等人，最後決定唔同記者再玩落去，直踩機場會合阿菲，兩人入閘時間只差3分鐘，當時只有兩班飛往歐洲的飛機準備起飛。拿！連記者都唔避忌，仲唔係趕飛機去歐洲二人世界?其實無謂咁鬼祟呀，反正你地都當眾玩過十指緊扣拉，一齊走遊埠都唔係乜野無見得光o者!

睇唻霆鋒和王菲越唻越夾，今次博大霧和閃電戰，配合得相當有默契，雖然仍棋差一著，未能達到天衣無縫之境，但起碼做到寧俾人知，莫俾人見。


HKCYBER編輯中心：玩時玩，千祈唔好兩個去，「三個」返!

Cecilia語: 真不喜歡CYBER.COM這種報道方式, CHEAP!

<hkcyber.com>